Hiling...

Para sa mga bituin sa langit…

Maniwala man kayo o hindi, naiintindihan ko siya… Hindi din ako kasing sama tulad ng kanyang iniisip… Lahat naman gustong maging maligaya. Hindi naman masamang maghangad nito… Nagkataon lang talaga sigurong ang bagay na hiniling niya sa inyo at ang bagay na magpapasaya sa kanya ay siya ring bagay na nagpapaligaya sa akin…

Hindi na ako magsisinungaling. Alam ko din namang hindi ko kayo maloloko… Nasaktan talaga ako nang kinuha niyo ito sa akin at ibinigay sa kanya… At inaamin kong hanggang ngayon ay nararamdaman ko pa din ang malaking kakulangang naidulot nito sa buhay ko… Pero tulad ng aking sinabi, naiintindihan ko…

Ganun naman talaga ang buhay, hindi ba? Lahat may kabayaran… Sa tuwing may natatanggap ka, may isang tao ding nawawalan…

At dahil ayoko na ding may masaktan pa sa paghiling ko sa aking pansariling kaligayahan, may isang bagay na lang akong ipapakiusap sa inyo… Hinihiling kong ibigay niyo sana ang kaligayahan ng taong matiyagang humahawak sa kamay ko habang walang sawang nakikinig at dumadamay sa aking kalungkutan… Ito lang kasi ang tangi kong magagawa para sa kanya sa ngayon… salamat...